काभा महिला भलिबल च्याम्पियनसिपको उपाधि इरानले जितेको छ। त्रिपुरेश्वरस्थित राष्ट्रिय खेलकुद परिषद्को कभर्डहलमा शुक्रबार सम्पन्न फाइनल खेलमा काजकस्तानलाई ३–१ को सेटमा पराजित गर्दै इरान च्याम्पियन बनेको हो।
इरानले काजकस्तानमाथि २५–१८, १९–२५, २५–१५ र २५–२१ को जित निकाल्दै उपाधि आफ्नो नाममा गर्यो। प्रतियोगिताभर उत्कृष्ट प्रदर्शन गरेको इरानले समूह चरणमै पनि काजकस्तानलाई ३–० को सोझो सेटमा हराएको थियो।
सेमिफाइनलमा इरानले घरेलु टोली नेपाललाई सोझो सेटमा पराजित गर्दै फाइनल यात्रा तय गरेको थियो भने काजकस्तानले भारतलाई हराएर उपाधि भिडन्त पक्का गरेको थियो।
यता घरेलु टोली नेपाल भने यसपटक पदकविहीन बन्न पुगेको छ। तेस्रो स्थानका लागि भएको खेलमा भारतसँग ३–१ को सेटमा पराजित भएपछि नेपाल चौथो स्थानमा सीमित भयो। भारतले नेपाललाई २५–२२, २५–२३, १५–२५ र २५–२२ ले हराएको हो।
नेपालले तेस्रो सेट जित्दै खेलमा फर्कने संकेत गरे पनि निर्णायक क्षणमा कमजोर प्रदर्शन गर्दा हार व्यहोर्न बाध्य भयो। यसअघि समूह चरणमा पनि भारतसँग नेपाल ३–२ को सेटमा पराजित भएको थियो।
काठमाडौंमा आयोजना भएका पछिल्ला तीन काभा महिला भलिबल प्रतियोगितामध्ये नेपाल पहिलो पटक पदकविहीन बनेको हो। नेपालले सन् २०२४ को संस्करणमा रजत पदक जितेको थियो भने त्यसअघि कास्य पदक हात पारेको थियो।
