एभरेष्ट महिला भलिबल लिगको तेस्रो संस्करण असोज ८ देखि १७ गतेसम्म हुने

नेपालको पहिलो महिला फ्रेन्चाइज भलिबल प्रतियोगिता एभरेष्ट महिला भलिबल लिग (ईडब्लुभिएल) को तेस्रो संस्करण आगामी असोज ८ देखि १७ गतेसम्म काठमाडौंको त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा आयोजना हुने भएको छ।

आयोजक इन्फिनिटी ड्रिम्सले सोमबार प्रेस विज्ञप्ति जारी गर्दै सहभागी फ्रेन्चाइज टोली तथा सरोकारवालासँगको छलफलपछि प्रतियोगिताको मिति तय गरिएको जनाएको हो।

पछिल्लो समय नेपाली महिला भलिबलप्रति दर्शकको आकर्षण उल्लेखनीय रूपमा बढिरहेको उल्लेख गर्दै आयोजकले दशैंअघि आयोजना हुने लिगले खेलप्रेमीलाई खेलकुद र चाडपर्वको मनोरञ्जन एकैसाथ प्रदान गर्ने विश्वास व्यक्त गरेको छ।

एसियाकै पहिलो महिला फ्रेन्चाइज भलिबल लिगका रूपमा परिचित ईडब्लुभिएलले नेपाली महिला भलिबलको विकास र प्रवर्द्धनमा महत्वपूर्ण योगदान पुर्‍याउँदै आएको आयोजकको दाबी छ। अघिल्ला दुई संस्करणको सफलतापछि तेस्रो संस्करणलाई अझ व्यवस्थित, परिष्कृत र भव्य बनाइने पनि जनाइएको छ।

प्रतियोगिताको पहिलो संस्करण काठमाडौंमा आयोजना भएको थियो भने दोस्रो संस्करण पोखरामा सुरु गरिएको थियो। तर केही प्राविधिक कारणले प्रतियोगिता बीचमै स्थगित भएपछि बाँकी खेल र फाइनल काठमाडौंमै सम्पन्न गरिएको थियो।

कर्णाली यश्विसले पहिलो र दोस्रो दुवै संस्करणको उपाधि जित्दै प्रतियोगितामा आफ्नो वर्चस्व कायम गरेको छ। दोस्रो संस्करणमा कर्णाली यश्विससँगै ललितपुर क्विन्स, काठमाडौं स्पाइकर्स, मधेश युनाइटेड, लुम्बिनी लाभाज र पोखरा निन्जाले प्रतिस्पर्धा गरेका थिए।

एभरेष्ट महिला भलिबल लिगका टेक्निकल डाइरेक्टर जगदीश भट्टले तेस्रो संस्करण अघिल्ला संस्करणभन्दा अझ उत्कृष्ट र आकर्षक हुने विश्वास व्यक्त गरे।

“नेपालको महिला भलिबल अहिले एफआईभीबी विश्व वरीयतामा समावेश भएको छ, एसियाको शीर्ष १० भित्र पर्न सफल भएको छ र जापानमा हुने एसियन गेम्सका लागि पनि छनोट भएको छ। यस्तो अवस्थामा आयोजना हुन लागेको तेस्रो संस्करण अझ भव्य र प्रतिस्पर्धात्मक हुनेछ,” भट्टले भने।

उनले लिगले खेलाडीलाई आर्थिक रूपमा समेत लाभ पुर्‍याउने भएकाले नेपाली महिला भलिबलको समग्र विकासमा महत्वपूर्ण भूमिका खेल्ने बताए।

राखेप कभर्डहलको स्तरोन्नतिपछि त्यहाँ काभा महिला भलिबल च्याम्पियनसिपसहित विभिन्न राष्ट्रियस्तरका प्रतियोगिता सफलतापूर्वक सम्पन्न भइसकेकाले यसपटक पनि काठमाडौंमै लिग आयोजना गर्न लागिएको आयोजकले जनाएको 

Read More

राष्ट्रपति रनिङ शिल्डमा गण्डकीको गौरवपूर्ण सफलता, लगातार दोस्रो पटक भलिबलको स्वर्ण जित्दै उपाधि रक्षा

 

१६औँ राष्ट्रपति रनिङ शिल्ड प्रतियोगिताअन्तर्गत छात्र भलिबलतर्फ गण्डकी प्रदेशले उत्कृष्ट पुनरागमन गर्दै स्वर्ण पदक जितेको छ। शुक्रबार काठमाडौंको त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सम्पन्न रोमाञ्चक फाइनलमा लुम्बिनी प्रदेशलाई ३–२ सेटले पराजित गर्दै गण्डकीले लगातार दोस्रो पटक च्याम्पियन बन्ने गौरव हासिल गरेको हो।

गत संस्करणको विजेता समेत रहेको गण्डकीले यस जितसँगै आफ्नो उपाधि सफलतापूर्वक रक्षा गरेको छ। टोलीका व्यवस्थापक लेखनाथ लम्सालका अनुसार कठिन परिस्थितिबाट खेलमा फर्किँदै गण्डकीले स्वर्ण पदक जित्न सफल भएको हो।

फाइनल खेलको सुरुआत भने गण्डकीका लागि सुखद रहेन। लुम्बिनीले पहिलो सेट २५–२० तथा दोस्रो सेट २६–२४ ले जित्दै खेलमा २–० को अग्रता बनाएको थियो। लगातार दुई सेट गुमाएपछि गण्डकी दबाबमा परेको देखिए पनि टोलीले असाधारण आत्मविश्वास र संयम प्रदर्शन गर्दै खेलमा शानदार पुनरागमन गर्यो।

तेस्रो सेटमा गण्डकीले आक्रामक खेल प्रस्तुत गर्दै २५–२३ को जित निकाल्यो। त्यसपछि चौथो सेटमा पनि उत्कृष्ट प्रदर्शनलाई निरन्तरता दिँदै २५–१७ ले आफ्नो पक्षमा पार्यो र खेललाई २–२ को बराबरीमा ल्यायो।

निर्णायक पाँचौं तथा अन्तिम सेटमा दुवै टोलीबीच कडा प्रतिस्पर्धा भए पनि गण्डकीले महत्वपूर्ण क्षणहरूमा उत्कृष्ट प्रदर्शन गर्दै १५–११ को जित निकाल्यो। अन्ततः ३–२ को समग्र जितसहित गण्डकीले स्वर्ण पदक आफ्नो नाममा लेखाउन सफल भयो।

प्रतियोगितामा गण्डकीका खेलाडीहरूले दबाबपूर्ण अवस्थामा समेत उत्कृष्ट खेल कौशल, संयम र टिमवर्क प्रदर्शन गरेका थिए। विशेषगरी पछिल्ला तीन सेटमा टोलीले देखाएको पुनरागमन क्षमताले दर्शक तथा समर्थकहरूको मन जित्न सफल भयो।

यस सफलतासँगै गण्डकी प्रदेशले विद्यालयस्तरीय राष्ट्रिय खेलकुदमा आफ्नो प्रभुत्व कायम राख्दै भलिबलमा लगातार दोस्रो स्वर्ण पदक जित्ने उपलब्धि हासिल गरेको छ।

यता छात्रा भलिबलतर्फ भने गण्डकी प्रदेश अपेक्षाअनुसार प्रदर्शन गर्न नसक्दा पदक दौडबाट बाहिरिँदै चौथो स्थानमा सीमित रह्यो।

Read More

साफ महिला च्याम्पियनसिप: सेमिफाइनल समीकरण पूरा, नेपालले बंगलादेशसँग खेल्ने

 भारतको गोवामा जारी साफ महिला च्याम्पियनसिपको सेमिफाइनल समीकरण पूरा भएको छ। समूह चरणका सबै खेल सम्पन्न भएसँगै अन्तिम चारमा पुग्ने टोलीहरूको टुंगो लागेको हो।

समूह ‘ए’ बाट नेपाल दुवै खेलमा जित निकाल्दै समूह विजेताको रूपमा सेमिफाइनलमा पुगेको छ। सोही समूहबाट भुटान एक जित र एक हारसहित उपविजेता बन्दै अन्तिम चारमा स्थान बनाउन सफल भयो।

यता समूह ‘बी’ बाट आयोजक भारतले पनि दुवै खेल जित्दै समूह विजेताको रूपमा सेमिफाइनल यात्रा तय गरेको छ। बंगलादेश एक जित र एक हारसहित समूह उपविजेता बन्दै सेमिफाइनलमा प्रवेश गरेको हो।

अब पहिलो सेमिफाइनलमा नेपाल र बंगलादेशबीच प्रतिस्पर्धा हुनेछ भने दोस्रो सेमिफाइनलमा भारत र भुटान आमनेसामने हुनेछन्। दुवै सेमिफाइनल खेल बुधबार हुने तालिका छ।

प्रतियोगिताको उपाधि भिडन्त अर्थात् फाइनल खेल आगामी शुक्रबार आयोजना गरिनेछ।

Read More

काभा महिला भलिबल च्याम्पियनसिपको उपाधि इरानले जितेको छ।

 

काभा महिला भलिबल च्याम्पियनसिपको उपाधि इरानले जितेको छ। त्रिपुरेश्वरस्थित राष्ट्रिय खेलकुद परिषद्को कभर्डहलमा शुक्रबार सम्पन्न फाइनल खेलमा काजकस्तानलाई ३–१ को सेटमा पराजित गर्दै इरान च्याम्पियन बनेको हो।

इरानले काजकस्तानमाथि २५–१८, १९–२५, २५–१५ र २५–२१ को जित निकाल्दै उपाधि आफ्नो नाममा गर्‍यो। प्रतियोगिताभर उत्कृष्ट प्रदर्शन गरेको इरानले समूह चरणमै पनि काजकस्तानलाई ३–० को सोझो सेटमा हराएको थियो।

सेमिफाइनलमा इरानले घरेलु टोली नेपाललाई सोझो सेटमा पराजित गर्दै फाइनल यात्रा तय गरेको थियो भने काजकस्तानले भारतलाई हराएर उपाधि भिडन्त पक्का गरेको थियो।

यता घरेलु टोली नेपाल भने यसपटक पदकविहीन बन्न पुगेको छ। तेस्रो स्थानका लागि भएको खेलमा भारतसँग ३–१ को सेटमा पराजित भएपछि नेपाल चौथो स्थानमा सीमित भयो। भारतले नेपाललाई २५–२२, २५–२३, १५–२५ र २५–२२ ले हराएको हो।

नेपालले तेस्रो सेट जित्दै खेलमा फर्कने संकेत गरे पनि निर्णायक क्षणमा कमजोर प्रदर्शन गर्दा हार व्यहोर्न बाध्य भयो। यसअघि समूह चरणमा पनि भारतसँग नेपाल ३–२ को सेटमा पराजित भएको थियो।

काठमाडौंमा आयोजना भएका पछिल्ला तीन काभा महिला भलिबल प्रतियोगितामध्ये नेपाल पहिलो पटक पदकविहीन बनेको हो। नेपालले सन् २०२४ को संस्करणमा रजत पदक जितेको थियो भने त्यसअघि कास्य पदक हात पारेको थियो।

Read More

 फ्रेन्डसीप युवा एकताद्वारा संस्था स्थापनाको अवसरमा आयोजित प्रथम फ्रेन्डसीप कप-२०८३ (क्लव स्तरीय पुरुष भलिबल प्रतियोगिता) को पत्रकार सम्मेलन मिति २०८३ जेठ १० गते दिउँसो ३:०० बजे रहेको छ।

यो प्रतियोगिताको सबै खेलहरुको प्रत्यक्ष प्रसारण Khel Khabar युट्युब च्यानलमार्फत हेर्न सक्नुहुनेछ। प्रतियोगिता यहि मिति २०८३ जेठ १३ गते देखि १७ गते सम्म पोखरा-३, नदिपुर (छन्त्याल समाज) को खेलमैदानमा सञ्चालन हुनेछ।

Read More

नेपालको पहिलो जित, सेमिफाइनलको सम्भावना बलियो

 

नेपालले काभा महिला भलिबल च्याम्पियनसिप २०२६ मा पहिलो जित दर्ता गरेको छ ।

त्रिपुरेश्वरस्थित राष्ट्रिय खेलकुद परिषद्को कभर्डहलमा शनिबार भएको खेलमा नेपालले कीर्गिस्तानलाई ३-० को सोझो सेटमा पराजित गरेको हो । नेपालले २५-१८, २५-२० र २५-१३ ले खेल आफ्नो पक्षमा पार्यो ।

सुरुवातदेखि नै आक्रामक देखिएको नेपालले खेलभर दबाब कायम राखेको थियो । नेपालको जितमा उत्कृष्ट प्रदर्शन गरेकी सुमित्रा रेग्मी प्लेयर अफ दि म्याच घोषित भइन् ।

यो जितसँगै नेपाल समूह ‘ए’ मा ४ अंकसहित दोस्रो स्थानमा पुगेको छ । भारत ५ अंकसहित शीर्ष स्थानमा रहँदा कीर्गिस्तान ३ अंकसहित तेस्रो र माल्दिभ्स अंकविहीन रहेको छ ।

नेपालले अब आइतबार माल्दिभ्ससँग खेल्नेछ । उक्त खेल जिते नेपाल सेमिफाइनलमा पुग्नेछ ।

यसअघि शनिबार नै भएको अन्य खेलमा भारतले माल्दिभ्सलाई ३-० को सोझो सेटमा हराएको थियो । त्यस्तै, कजाकस्तानले श्रीलंकामाथि पनि सोझो सेटमा जित निकालेको छ ।

Read More

काभामा नेपाल भारतसँग ३-२ को सेटमा पराजित

 घरेलु मैदानमा सुरु काभा महिला भलिबल च्याम्पियनसिप २०२६ मा नेपालले हारबाट सुरुवात गरेको छ। त्रिपुरेश्वरस्थित राखेप कभर्डहलमा भएको खेलमा नेपाल भारतसँग ३-२ को सेटमा पराजित भयो।

नेपालले पहिलो सेट २५-२१ ले जिते पनि भारतले लगातार दोस्रो र तेस्रो सेट आफ्नो पक्षमा पार्दै अग्रता बनायो। नेपालले चौथो सेट जितेर खेल बराबरीमा ल्याए पनि निर्णायक पाँचौं सेट १५-९ ले भारतले जित्यो।

यो खेलमा निरूता ठगुन्नाले पहिलो पटक नेपालको कप्तानी सम्हालिन्। नेपालले भोलि किर्गिस्तानसँग खेल्नेछ।

यसअघि इरानले बङ्गलादेशलाई ३-० को सोझो सेटमा हराएको थियो।

एफआईभीबी र्‍याङ्किङसँग जोडिएको प्रतियोगितामा ८ राष्ट्र सहभागी छन्। नेपाल समूह ‘ए’ मा भारत, किर्गिस्तान र माल्दिभ्ससँग रहेको छ। प्रतियोगिताका खेल डिगो एपमार्फत हेर्न सकिनेछ।

Read More