नेपाली पुरुष भलिबल टोलीले काभा पुरुष भलिबल च्याम्पियनसिपमा लगातार तेस्रो हार बेहोरेको छ। बुधबार भएको आफ्नो तेस्रो खेलमा नेपाल आयोजक पाकिस्तानसँग ३–० को सोझो सेटमा पराजित भयो।
बलियो पाकिस्तानले नेपाललाई २५–१४, २५–१८ र २५–१० को सेटमा हराउँदै प्रतियोगितामा लगातार तेस्रो जित दर्ता गर्यो। यसअघि पनि पाकिस्तानले आफ्ना दुवै खेल सोझो सेटमा जितेको थियो।
लगातार तीन हारपछि नेपालको सेमिफाइनल यात्रा कठिन बनेको छ। शीर्ष चारभित्र रहँदै अन्तिम चारमा स्थान बनाउन नेपालले बाँकी दुवै खेलमा जित निकाल्नुपर्ने दबाब रहेको छ।
यसअघि नेपाल श्रीलंकासँग पनि पाँच सेटसम्म चलेको प्रतिस्पर्धात्मक खेलमा ३–२ ले पराजित भएको थियो। नेपालले २–१ को सेट अग्रता बनाए पनि त्यसलाई कायम राख्न नसक्दा श्रीलंकाले २५–१८, २१–२५, १९–२५, २५–२१ र १५–११ को नतिजासहित पुनरागमन जित हात पारेको थियो।
प्रतियोगिताको पहिलो खेलमा पनि नेपालले काजकस्तानविरुद्ध उत्कृष्ट पुनरागमन गर्दै खेललाई पाँचौं सेटसम्म पुर्याएको थियो। २–० ले पछि परेको अवस्थाबाट २–२ को बराबरी गरे पनि निर्णायक सेट गुमाउँदै नेपाल २५–१९, २५–२१, ३२–३४, १९–२५ र १५–९ को सेटमा ३–२ ले पराजित भएको थियो।
अब नेपालले बाँकी दुई खेल बंगलादेश र उज्वेकिस्तानविरुद्ध खेल्नेछ। प्रतियोगितामा एक दिन विश्राम रहनेछ।
यस संस्करणको च्याम्पियनसिपमा नेपाल, पाकिस्तान, काजकस्तान, श्रीलंका, बंगलादेश र उज्वेकिस्तान गरी ६ टोलीको सहभागिता रहेको छ। सबै टोलीले एकअर्कासँग खेलिसकेपछि शीर्ष चार टोली सेमिफाइनलमा प्रवेश गर्नेछन्।
उल्लेखनीय रूपमा, झन्डै एक दशकअघि सेन्ट्रल जोन प्रतियोगितामा नेपालले कास्य पदक जितेको थियो, जुन पुरुष भलिबलमा नेपालको पहिलो अन्तर्राष्ट्रिय पदक हो।
नेपालको टोली:
हरिहजुर थापा (कप्तान), सुनिल बोहरा, पहल गहतराज, सन्तोष विक, सरोज वर्देवा, राजेन्द्र धामी, सुरज चुनारा, नृपध्वज बस्नेत, रविन नगरकोटी, हिमाल सुनारी, दिपेश कुँवर र विनोदबहादुर चन्द।
प्रशिक्षक मण्डल:
मुख्य प्रशिक्षक – जगदिश प्रसाद भट्ट
सहायक प्रशिक्षक – रुपेश कुमार विष्ट
व्यवस्थापक – सोमबहादुर श्रेष्ठ
.png)
