नेपालले आईसीसी टी–२० विश्वकपको समूह चरणको अन्तिम खेलमा स्कटल्यान्डलाई ७ विकेटले पराजित गर्दै सान्त्वनाजनक जित हात पारेको छ। मुम्बईको वानखेडे स्टेडियममा भएको खेलमा १७१ रनको लक्ष्य नेपालले ४ बल बाँकी रहँदा मात्र ३ विकेट गुमाएर पूरा गर्यो।
यो जितसँगै नेपालले सन् २०१४ पछि पहिलो पटक विश्वकपमा खेल जित्दै १२ वर्षको लामो प्रतीक्षा तोडेको छ। विश्वकप यात्राको सुखद अन्त्य गर्न नेपाल सफल भएको हो।
नेपालको जितमा दीपेन्द्र सिंह ऐरी र गुलशन झाको अविजित साझेदारी निर्णायक बन्यो। चौथो विकेटका लागि उनीहरूले ७३ रनको साझेदारी गर्दै टोलीलाई लक्ष्यसम्म पुर्याए। दीपेन्द्रले २३ बलमा ४ चौका र ३ छक्काको सहयोगमा अर्धशतक पूरा गर्दै ५० रनमा अविजित रहे। गुलशनले १७ बलमा १ चौका र २ छक्का प्रहार गर्दै २४ रन बनाए।
यसअघि ओपनर कुशल भुर्तेल र आशिफ शेखले पहिलो विकेटका लागि ७४ रनको साझेदारी गर्दै बलियो आधार तयार पारेका थिए। कुशलले ३५ बलमा १ चौका र ६ छक्कासहित ४३ रन बनाए भने आशिफले २७ बलमा २ छक्कासहित ३३ रनको योगदान दिए। कप्तान रोहित पौडेलले १४ बलमा १६ रन जोडे।
बलिङतर्फ स्कटल्यान्डका माइकल लिस्कले तीन विकेट लिए।
टस जितेर फिल्डिङ रोजेको नेपालविरुद्ध पहिले ब्याटिङ गरेको स्कटल्यान्डले निर्धारित २० ओभरमा ७ विकेट गुमाएर १७० रन बनायो। स्कटल्यान्डका लागि माइकल जोन्सले ४५ बलमा ८ चौका र ३ छक्कासहित सर्वाधिक ७१ रन बनाए। जर्ज मुन्सेले २७ रनको योगदान दिए।
नेपालका लागि सोमपाल कामीले उत्कृष्ट बलिङ गर्दै ४ ओभरमा २५ रन खर्चिएर ३ विकेट लिए। नन्दन यादवले २ विकेट लिए भने कप्तान रोहित पौडेल र कुशल भुर्तेलले समान १–१ विकेट हात पारे।
यस जितसँगै नेपालले सन् २०१४ मा हङकङ र अफगानिस्तानलाई पराजित गरेपछि पहिलो पटक विश्वकपमा जित दर्ता गर्न सफल भएको छ।
0 Post a Comment:
Post a Comment